ചൊൽക്കൊള്ളുമങ്ങുന്നവിടുന്നയച്ച
നൽക്കത്തു ലക്കോട്ടിവ മൽക്കരത്തിൽ
ചിക്കന്നു കിട്ടീട്ടതുകണ്ടനേര-
ത്തുൾക്കാമ്പിലാനന്ദവുമുൽഭവിച്ചു.
ദക്ഷയാഗം മിടുക്കന്നു തൽക്ഷണംതന്നെ നൽകി ഞാൻ
ലക്ഷണം തെറ്റി മൽക്കയ്യിൽ സൂക്ഷ്മം രണ്ടില്ല പുസ്തകം.
എന്നാലതിന്റെ മറുകത്തവിടുന്നയപ്പാൻ
വന്നീലസംഗതി നമുക്കതിനുള്ള മൂലം
നന്നായ് ഭവാനറിയുവാൻ വിവരം വിശേഷി-
ച്ചിന്നോതിടുന്നു വിരവോടതു കേട്ടിടേണം.
ആവട്ടത്തൂരമ്പിടും തമ്പുരാൻ തൻ
ദേവസ്വത്തിൻ കാര്യമോരോന്നിനായി
പോവും മാലും മറ്റുമോര്‍ത്തെപ്പൊഴും ഞാൻ
മേവീടുന്നു സാവകാശം ചുരുക്കം.
ആര്‍ക്കും നിനച്ചാൽ തകരാറിലൊന്നു-
മാക്കാൻ തരത്തിൽ കഴിയാത്തവണ്ണം
ആര്‍ക്കാൻ കരാറൊന്നു റജിസ്ത്രതന്നി-
ലാക്കേണമെന്നാണു വിചാരമിപ്പോൾ.
ആയതിന്നായിഞാൻ വന്നു പോയനാളത്ര ഭൂപതേ!
കായക്ലേശമൊഴിഞ്ഞൊന്നുമായിട്ടില്ലൂര ചെയ്യുവാൻ
രണ്ടുനാലുദിനമത്ര താമസം
വേണ്ടതായിവരുമെന്നു കണ്ടുഞാൻ
വണ്ടികേറിയവിടുന്നു സർവ്വവും
കൊണ്ടുപോന്നു മരുവുന്നു പൂർവ്വവൽ