ആശിച്ചാൽപ്പോര യാതൊന്നു, -
മാര്‍ജ്ജിപ്പാനുദ്യമിക്കണം;
കൂര്‍ക്കം വലിച്ചിടും സിംഹം-
കൊമ്പനെത്തിന്മതെങ്ങനേ?

ഉറുമ്പും മെല്ലവേ പോയാ-
ലൊട്ടേറെ വഴി പോയിടും;
അനങ്ങിടാഞ്ഞാൽത്താർക്ഷ്യന്നു-
മക്കിടപ്പിൽക്കിടക്കണം.

ഉദ്യമിപ്പവനെത്താങ്ങു-
മോടിവന്നലർമങ്കയാൾ;
ചെറ്റനങ്ങാതിരിപ്പോനെ-
ച്ചെറ്റയിൽച്ചേട്ട ചേർത്തിടും.

ഊണിന്നു രുചിയുണ്ടാവി,-
ല്ലുറക്കം ദൂരെ വിട്ടുപോം;
അകാലമൃത്യു വശനാ-
മലസന്‍ഹ തജീവിതൻ.

വിധിക്കു നരനോടില്ല-
വീര്യം കാട്ടീടുവാൻ തരം,
സത്വം ഹരിപ്പാൻ മുൻകൂട്ട-
ത്തിന്ദ്രിയെത്താതിരിക്കുകിൽ.

ദാരിദ്രമാം പിശാചിന്റെ-
സദനദ്വാരമേവനും
തന്ദ്രിതൻകൈയിലുള്ളോരു-
താക്കോൽ കൊണ്ടേ തുറന്നിടൂ.

ബലമറ്റ ശരീരത്തെ-
പേര്‍ത്തും രോഗം ഗ്രസിച്ചിടും;
ആലസ്യത്തിലമിഴ്ന്നോനെ-
യാപത്തടിമയാക്കിടും.

പ്രതിഭയ്ക്കും ഭയം തീർന്നു-
പാദം മുന്നോട്ടു വെയ്ക്കുവാൻ
അഭ്യാസത്തിന്റെ സാഹായ്യ-
മവശ്യം വേണമന്വഹം.

വേലയ്ക്കായ് വിധി നല്കുന്നൂ-
വെളിച്ചമിയലും പകൽ,
ഇടയ്ക്കു വിശ്രമിച്ചീടാ-
നിരുട്ടുള്ളൊരു രാത്രിയും.

അശുഭാഗമനത്രസ്തു-
ന്നഹസ്സെന്നും തമിസ്രയാം;
ശുഭാപ്തി കാത്തിരിപ്പോനോ -
സൂര്യനുണ്ടതുരാവിലും.

മുറയ്ക്കു ലാക്കിൽ പാഞ്ഞെത്താം-
മുന്നോട്ടേക്കു കുതിക്കുകിൽ;
കൈകെട്ടിനിന്നാൽ നടന്നീടാം;-
കാലം വന്നവഴിക്കുപോം

ആരു കണ്ടൂ? ജയം നമ്മൾ-
ക്കടുത്തനിമിഷം വരാം;
അല്ലെങ്കിലായുരന്തത്തി-
ലാകട്ടേ; ഹാനിയെന്തതിൽ?

തന്നെത്താനുദ്ധരിക്കേണം;-
തന്നെത്താഴ്ത്തരുതാരുമേ;
താൻ തന്നെയാര്‍ക്കും തൻബന്ധു;-
താൻതന്നെ പരിപന്ഥിയും.

ഉത്സാഹം രിപുവാം മിത്ര-
മാലസ്യം മിത്രമാം രിപു;
വിദ്യ നഞ്ഞാകുമമൃതം, -
തൃഷ്ണ, പീയൂഷമാം വിഷം.

ഉണർന്നെഴുന്നേറ്റോജസ്സോ-
ടുദ്യമിക്കുന്നവൻ പുമാൻ;
ശ്വസിക്കുന്ന ശവം മാത്രം-
സ്വപ്നം കണ്ടു കിടപ്പവൻ.

സ്രഷ്ടാവുചെയ്തു തൻ കൃത്യം-
ദേഹം നമ്മൾക്കു നകവേ;
ഉരുളയുരുളയ്ക്കുകൂട്ടാ-
നുഴറുന്നീല തൽകരം.

പൌരുഷം സേചനം ചെയ്തേ-
ഫലിക്കൂ ദൈവമാം ദ്രുമം;
ഒറ്റച്ചക്രക്കറക്കത്തി-
ലോടുന്നീലൊരുവണ്ടിയും.

ദൈവത്തെക്കാത്തിരിക്കാതെ-
തേടണം നാം സമുദ്യമം;
വേലചെയ്യാം നമു,ക്കീശൻ-
വേണമെങ്കിൽ ഫലംതരും.

ഏതുഭാരം വഹിപ്പാൻ നാം-
യത്നിക്കുന്നു യഥാര്‍ത്ഥമായ്,
അബ്ഭാരത്തോടു താങ്ങീടു-
മായിരം ദേവർ നമ്മളെ

ഊതിപ്പറത്താം വിഘ്നങ്ങ,-
ളുൾക്കരുത്തോടുയർന്നിടാം;
ഉത്സാഹിയൊരുനാൾ സ്വാമി-
യൂഴിക്കും ത്രിദിവത്തിനും.