പയ്യീച്ച പൂച്ച പുലി വണ്ടെലി ഞണ്ടു പച്ച-
പ്പയ്യെന്നുതൊട്ടു പലമാതിരിയായ ജന്മം
പയ്യെക്കഴിഞ്ഞു പുനരിപ്പുരുഷാകൃതിത്വം
കയ്യിൽക്കിടച്ചവർ കളഞ്ഞുകുളിച്ചിടൊല്ലേ!

ഹേമാംഗനാദിവിഷയാംബുധിയിൽപ്പതിച്ചു
കാമാദിവൈരിവശരായ്ക്കഷണിച്ചിടാതെ
നാമിപ്രപഞ്ചപരമാര്‍ത്ഥമറിഞ്ഞു ചുമ്മാ
നാമം ജപിക്കു ജനത, ജനിയാതിരിപ്പാൻ.

ഇന്നുണ്ടു ജോലി, ഭഗവൽസ്മൃതി നാളെയാവാ-
മെന്നോര്‍ത്തുപോകരുതു, മാനുഷനായ്പ്പിറന്നാൾ
എന്നോ നമുക്കു മരണം, മൃതിപെട്ടുപോയാൽ-
പിന്നെപ്പിറക്കുവതുമെന്തൊരു ജന്തുവായോ?

നോക്കുള്ള കര്‍മ്മചയനാൾവഴി ചിത്രഗുപ്തൻ
ചേര്‍ക്കുന്ന ബുക്കിലൊരു നാമപദം പതിഞ്ഞാൽ
ലാക്കായ് നമുക്കു പുനരാപ്പുരുഷന്റെ നേരെ
നോക്കുന്നതിന്നു യമനില്ലവകാശലേശം.

കാലാരിതൻ കഥ മറന്നു കളത്രപുത്ര-
ജാലം പുലർത്തുവതിനായ്പ്പണിചെയ്തിരുന്നാൽ
കാലൻ കയര്‍ത്തു കയറിട്ടു വലിച്ചിഴയ്ക്കും-
കാലം കടന്നു തടവാനൊരു ബന്ധുവാരോ?

ദായാദപുത്രഗൃഹഭൃത്യധനാഭിമാന-
ജായാദിയിൽക്കൊതി വളര്‍ക്കുമൊരിപ്രപഞ്ചം
മായാവിലാസമയമെന്നു മനസ്സിലായി-
പ്പോയാൽക്കഴിഞ്ഞു, പുനരായവ പുല്ലുപോലെ.

സാരം തിരക്കുകിലഹേബതുച്ഛമീസ്സം-
സാരം, സമസ്തമൊരു ശുദ്ധമഹേന്ദ്രജാലം;
ചാരം ധരിച്ച തിരുമേനിയിൽ നോം മനസ്സ-
ഞ്ചാരം തുടങ്ങീലതു പെട്ടപൊളിഞ്ഞു കാണാം.

തിയ്യാളിടുന്നതു തനിക്കൊരു തീറ്റയെന്നോര്‍-
ത്തിയ്യാനതിൽ ബത പതിച്ചുപെടുംപ്രകാരം
ഇയ്യുള്ള നാം വിഷയബന്ധവിഷത്തിലും വീ-
ണയ്യോ! കിടന്നു കഷണിച്ചു നശിച്ചിടുന്നു.

മുട്ടാതെ കണ്ടു ഭഗവൽസ്മരണേ മനസ്സു
മുട്ടാതെകണ്ടു കഴിയുന്നൊരു മര്‍ത്ത്യജന്മം
പൊട്ടിച്ചിടാതെയൊരു തേങ്ങ കരിംകുരങ്ങിൻ-
കുട്ടിക്കു കിട്ടിയതുപോലെ കളഞ്ഞിടുന്നൂ.

സൂരിവ്രജത്തൊടിടപെട്ടിതരാനുബന്ധം
ദൂരെ ത്യജിച്ചു ദുരഹംകൃതിയുള്ളതെല്ലാം
തീരെക്കളഞ്ഞു തിരുനാമപദം ജപിച്ചാൽ
തീരും നമുക്കു ജനനീ ജഠരപ്രവേശം.