അറ്റം പെടാത്ത വിഷയാബ്ധിയിൽ മുങ്ങിമുങ്ങി-
ക്കുറ്റംപിഴപ്പതിനുമുമ്പിവനെസ്സഹർഷം
തെറ്റെന്നു കയറയച്ചു വലിച്ചുകേറ്റി-
പ്പെറ്റമ്മപോലെ പരമേശ്വരി! പോറ്റണം നീ. 1

ആനത്തുകൽത്തുകിലുടുത്തസുമാസ്ത്രശത്രു-
സ്ഥാനത്തു നിൽപ്പൊരു മുതുച്ചിടയന്റെ നേരെ
മാനത്തൽപൂണ്ടമിഴി വിട്ടു വലച്ചു ദേഹ-
ദാനത്തെ വാങ്ങിയ വരാംഗി! വരം തരേണം. 2

ഇല്ലാരുമാശ്രയമെനിക്കചലാത്മജേ! നീ-
യല്ലാതെയെന്ന പരമാർത്ഥകക്കുരുന്നിൽ
ഉല്ലാസപൂർവ്വമൊരുനേരമുദിക്കിലെന്റെ
വല്ലായ്മ തീർന്നു, ബഹുവമ്പരിൽ മുമ്പനായ് ഞാൻ. 3

ഈടേറിടും മഹിഷസുംഭനിസുംഭദൈത്യ-
ക്കാടേറെ മുഷ്കൊടു കരിച്ച മഹാമഹസ്സേ!
പാടേ മമാർത്തിഭരമാം ചെടി ഭസ്മ‌മാക്കി-
ക്കൂടേ, നിനക്കതിനു വല്ല ഞെരുക്കമുണ്ടോ? 4

ഉണ്ടാമൊരാൾക്കു സുഖ, മന്യനു ദുഃഖ, മിന്നു,
രണ്ടാംദിനം കഥ കഴിഞ്ഞിടുമീ സ്വഭാവം
കണ്ടാകിലും വിഷയസക്തി വിടാതെ ലോകം
തിണ്ടാടിടുന്നിതതിലെന്നെയുമെണ്ണിടൊല്ലേ. 5