ഒന്നാമങ്കം

ഹരിഃ ശ്രീ ഗണപതയെ നമഃ അവിഘ്നമസ്‌തു ശ്രീഗുരുഭ്യോ നമഃ.

ശ്രീ ഭദ്രകാളൈ നമഃ

ഗോഷ്ഠിത്തത്തോടു ഭൂതാവലി പശുപതിത-
ന്നാജ്ഞ കയ്ക്കൊണ്ടു കാട്ടും
നാട്ട്യം കണ്ടപ്പൊഴുണ്ടായൊരു മലമകൾത-
ന്നഞ്ചിതപ്പുഞ്ചിരിയ്ക്ക്
കോട്ടം കൂടാതെ കൂപ്പുന്നിതു, കുടിമതിയായ്
കൂടുമീക്കൂരിരുട്ടിൻ
കൂട്ടത്തെത്തീരെ നീക്കാനതു വിലസണമെൻ
മാനസെ മാനമോടെ. 1

ഗുരുമദമൊടു വെള്ളിക്കുന്നിളക്കിച്ചമയ്ക്കു -
ന്നൊരു ദശവദനൻ തന്നുള്ളിലെ ഭള്ളുതീർപ്പാൻ
സ്മരപുരഹരനീശൻ മന്ദമൂന്നുന്ന തൃക്കാൽ-
പ്പെരുവിരൽ വിരവോടെന്നാര്‍ത്തിയെത്തീത്തിടേണം 2.

ശ്രീ വായ്ക്കുന്ന കുടുംബമാസകലവും
നിർധൂളിയാക്കീടുവാൻ
ഭാവിയ്ക്കും ജഡനായ പൂര്‍വ്വജനിട-
ഞ്ഞന്നിങ്ങു പോന്നാദരാൽ
സേവിയ്ക്കുന്ന വിഭീഷണന്നു സരസം
ലങ്കാധിപത്യം കൊടു-
ത്തേവര്‍ക്കും സുഖമേകിടും രഘുപതി-
യ്ക്കെന്നും തൊഴുന്നേനഹം 3

കൊട്ടത്തേങ്ങ, കരിമ്പു, നെയ്യു, ചെറുതേൻ,
വാഴപ്പഴം മാമ്പഴം,
ചട്ടറ്റോരട, യപ്പമെന്നിവ രസ-
ത്താൽ കാഴ്ചവച്ചീടുവാൻ
അഷ്ടാശേശർ വരുന്നകണ്ടസമയ-
ത്തോടേണ്ടതെങ്ങോട്ടതെ-
ന്നൊട്ടേറെജ്ജവമങ്ങുമിങ്ങുമലയും
ഹേരംബനാലംബനം 4

മഹേശനാം ശൃംഗപുരേശ്വരന്റെ
മഹപ്രഭാവം വിരവോടു കാണ്മാൻ
മഹാരസം പൂണ്ടിവിടേയ്ക്കു വന്ന
മഹീസുരോത്തംസ സദസ്സുകൊള്ളാം 5

ഗാഢഹാസ്യരസകൌതു കംപരം
കൂടുമീ ദ്വിജസദസ്സിൽ നിർണ്ണയം
നാടകം മധുരമംഗലാഖ്യമാ-
ണാടുവാൻ മധുരവാണി! നല്ലത് 6

“ഇക്കാവാകി”യ രാജ്ഞിതന്റെ തനയൻ
“കുഞ്ഞുണ്ണി”ഭൂപന്റെ നൽ-
തൃക്കാൽ സേവകനായ ശിഷ്യനമലൻ
ദേവൌഘ സേവാരതൻ
ചൊല്ക്കൊള്ളു ന്നൊരു കോടിലിംഗനൃവരൻ
“കൊച്ചുണ്ണി” ഭൂപാലനാ-
ണിക്കാവ്യം വിരചിച്ചതെന്നറികനീ
മാൻകണ്ണിമാർ മാലികെ! 7

കുഞ്ഞുണ്ണി, രവിയതെന്നും,
കുഞ്ഞേട്ടൻ, കൊച്ചുതമ്പുരാനെന്നും
കേടറ്റ പേരുകളെഴും
മാടോർവീശോക്തിയാണിതിൻമൂലം. 8

“കൊച്ചുണ്ണി" ത്തമ്പുരാനെന്നഖിലദിശി
പുകഴ്ന്നോരു ശാസ്ത്രജ്ഞവര്യൻ
കൊച്ചിക്കീശൻ തൃതീയൻ വിനയസുനയവാ-
നാതപോഗ്രപ്രതാപൻ
ഉൾച്ചേരും ദോഷമൊന്നെങ്കിലുമരികിലടു-
ക്കാതെ ശോഭിച്ചിടുന്നു-
ണ്ടഛിന്നാമോദമോടീ നൃപതിമണിയെ
നീ കേട്ടറിഞ്ഞിട്ടതില്ലെ? 9

ശ്രീരാമചന്ദ്രഭഗവാന്റെ ഗുണങ്ങളെല്ലാം
പാരാതെ ചേര്‍ന്നരുളുമീ ക്ഷിതിപാലനേഞാൻ
ധാരാളമായറിയുമീ നരനാഥനെക്കേ-
ട്ടാരാണു പാര്‍ക്കിലറിയാത്തതുപാരിടത്തിൽ? 10

കാന്ത്യാ പരം ശിശിരജാഡ്യജ ദോഷശാന്തി-
യ്ക്കേന്തും രസത്തൊടുവരുന്നു വസന്തകാലം
കോന്തക്കുറുപ്പിനുടെ ജാഡ്യജമായ ദോഷ-
ശാന്തിയ്ക്കിതാ മധുരമംഗലമെന്നപോലെ. 11

പ്രസ്താവന കഴിഞ്ഞു

ദുഷ്പുത്രനെന്നു കുലനാശമതിന്നുമൂലം
കെല്പിൽ ദരിദ്രത തുടങ്ങിയതൊന്നുമല്ല
സല്പുത്രനൊന്നുകുലവൃദ്ധിയതിന്നുമൂല-
മല്പേതരോത്തമ ധനാദികളൊന്നുമല്ല 12

ചിക്കന്നു കാരണവനുള്ളൊരു ദോഷമൂല-
മിക്കാലമെത്ര തറവാടുകൾ കെട്ടിടുന്നു!
വായ്ക്കുന്ന കാരണവനുള്ള ഗുണങ്ങൾകൊണ്ടു
പാര്‍ക്കുമ്പൊളെത്ര തറവാടുകൾ കേറിടുന്നു! 13

ക്ഷീണംവിട്ടു ധനഞ്ജയൻ കുരുകുലം
പാടെ ദഹിപ്പിച്ചതും
ചാണക്യൻ നവനന്ദവംശമഖിലം
നന്നായ് നശിപ്പിച്ചതും
ഹൂണന്മാരധുനാ ജഗത്തു മുഴുവൻ
വെക്കം ജയിയ്ക്കുന്നതും
ചേണൊക്കും പുരുഷപ്രയത്നമതിനാ-
ലാണെന്നു കാണുന്നു ഞാൻ 14

കോട്ട വിട്ടിക്കുഡംബ കൊടിയ കടസമു-
ദ്രത്തിൽ നിന്നുദ്ധരിപ്പാൻ
കോര്‍ട്ടിൽക്കോന്തക്കുറുപ്പിൻ ജളതകൾ തെളിവി-
യ്ക്കാതെ പറ്റില്ല നൂനം.
വാട്ടം കൂടാതതിന്നായ് ദ്രുതതരമിവനെ-
ക്കൊണ്ടു വിഡ്ഢിത്തമേറ്റം
കാട്ടിയ്ക്കേണം മറച്ചീടിലുമതു മറയാ-
തുള്ള മട്ടിൽപ്പകിട്ടിൽ 15

പിട്ടുകൾ പറഞ്ഞു പരനുടെ
ചട്ടറ്റ പണം കരസ്ഥമാക്കുന്ന
പട്ടന്മാരുടെ നടുവിൽ
പൊട്ടൻ കോന്തക്കുറുപ്പ് വാഴുന്നു. 16

ഇവരുടെ സല്ലാപം പര-
മവികലമഖിലം ശ്രവിയ്ക്കുവാനൊളിവായ്
ഇവിടമതിൽ നിന്നിടുന്നേൻ
ചെവികൾ കൊടുത്തല്പമാത്രനേരം ഞാൻ 17

കീറിപ്പറിഞ്ഞു നന്നായ്
നാറും നാര്‍പ്പട്ടു, കണ്ഠരുദ്രാക്ഷ
പാരം വിഭൂതിയെന്നിവ
ചേരും വേഷം വിശേഷമിതുപാര്‍ത്താൽ!! 18

ഒന്നാമങ്കം കഴിഞ്ഞു.

രണ്ടാമങ്കം

മുതിര, പയറു, കയ്പ, നല്പടോലം,
ചിതമിയലുന്നൊരു ചീര, ചേന, ചേന,
ഇതി പലപല സന്ധ്യപുഷ്ടികൊണ്ടീ-
ക്ഷിതിയതു പണ്ടതി ര്യമായിരുന്നു. 19

കേടറ്റീടിന വെറ്റിലക്കൊടികളും
തെങ്ങം കവുങ്ങും ഗുണം
കൂടും വാഴകളും കിഴങ്ങു പലതും
മറ്റുള്ള സസ്യങ്ങളും,
വാടീടാതിടചേര്‍ന്നു പണ്ടഴകിയോ-
രിത്തോപ്പിലിപ്പോളുണ-
ങ്ങീടുന്നോരു കവുങ്ങതെങ്ങിവകളു-
ണ്ടല്ലാതെയില്ലൊന്നുമേ 20

കണ്ടാൽ കണ്ണേല്ക്കുമാറുള്ളൊരു തടിയൊടഹോ
വന്മദം പൂണ്ടു ചീറ്റി-
ക്കൊണ്ടെത്തും കാള കന്നാലികളിവയതിനു-
ള്ളെണ്ണമെണ്ണൂറുപോരാ
പണ്ടോര്‍ത്താൽ പയ്ക്കൾ നൂറല്ലഴകിനൊടു കറ-
ന്നീടുവാനിപ്പൊളേവം
രണ്ടൊത്തൊന്നായിയല്ലൊ!; പരമിതു കഠിനം
ഹന്ത! മറെറന്തു ചൊൽവൂ. 21

പാട്ടം തീര്‍ത്തു രശീതു വാങ്ങുവതിനായ്
പണ്ടിങ്ങു വന്നേറ്റവും
കെട്ടിക്കാത്തു കിടക്കുമാളുകൾ കുറ-
ച്ചല്ലേ നിനച്ചീടുകിൽ
പെട്ടെന്നിപ്പൊഴുതായതിന്നു പകരം
കഷ്ടം! കടക്കാരതാ
പട്ടന്മാരുടെ കൊള്ളയായിതഖിലം
പൊയ്യല്ല വയ്യോര്‍ക്കുവാൻ. 22

തെല്ലും ദേഹമനങ്ങിടാതെ സുഖിയായ്
തേച്ചും കുളിച്ചുണ്ടു പ-
ണ്ടുല്ലാസാൽ പതിവായിടുന്ന ഗൃഹകാ-
ര്യാന്വേഷണം ചെയ്തഹോ!
മെല്ലെപ്പാര്‍ത്തൊരു കൃഷ്ണനെന്നു പറയു-
ന്നമ്മാമനിപ്പോളിതാ
വല്ലാതിങ്ങിനെ വേര്‍ത്തുകൊണ്ടിഹ കിള-
ച്ചീടുന്നു കൂടും ശുചാ 23

വേലൻ പാണനലക്കിടുന്നവർ കുറു-
പ്പും ചെട്ടിയും ക്ഷൌരമാം
വേലയ്ക്കുള്ളവർ കൊല്ലനും കൊശവനും
മൂശാരി യാശാരിയും
പാര്‍ക്കുമ്മണ്ണിവിടുത്തെയായതുവശാൽ
നൽച്ചൊല്പടിയ്ക്കാണുപ-
ണ്ടോര്‍ക്കുമ്പോളധുനാ കിളയ്ക്കുവതിനും
ഞാൻ തന്നെയായ്ത്തീര്‍ന്നുതേ 24

പണ്ടിങ്ങു നേടിയൊരു വസ്തു, പറമ്പു, നല്ല
പണ്ടങ്ങളെന്നിതഖിലം പണയത്തിലായി
കണ്ടോകൃഷ്ണക്കു ശീട്ടതിലെഴും കടമൊക്കെ വീട്ടാ-
നുണ്ടോ നിനയ്കിൽ മുതലിങ്ങു വിവാദമാണു്. 25

നാലുണ്ടച്ചികൾ ചേട്ടനു,
നാലിനെയും നല്ല പേടിയതുമുണ്ട്;
ചാലേ ചിലവിനിതിൽപ്പര-
മാലോചിയ്ക്കുമ്പൊൾ വേണ്ടതെന്തുള്ളു? 26

പൊട്ടൻ നമ്മുടെ കോന്ത-
ചേട്ടൻ സ്തുതിവാക്കു കേട്ടുമോഹിച്ചു്
ശീട്ടുകളൊപ്പിട്ടേകും
പട്ടന്മാര്‍ക്കായ് വൃഥാ തന്നെ. 27

എണ്ണായിരപ്പറയതിൽ കുറയാതെ നെല്ലു
ഖണ്ഡിച്ചു വിറ്റിടുമൊരിത്തറവാട്ടിലിപ്പോൾ
ഉണ്ണാനുമില്ല വകയിങ്ങിനെയായി; രണ്ടു
കണ്ണാണ സത്യ;മിതു ചൊൽകിനിയെന്തുവേണ്ടു? 29

ഗംഭീര മാനസനതായി വിളങ്ങിടുന്നീ-
നമ്പൂരി ശാസ്ത്രിവരനും ഗുണവാനുമാണ് ;
അമ്പോടു പാകൃഷ്ണക്കിലതുകൊണ്ടവിടുന്നു ചൊന്ന
വമ്പുള്ള പക്ഷമതു ദുർഘടമാകയില്ല. 30

മധുസിതാ മധുരോത്തമ ഭാഷിതൻ
മധുരമല ഭൂസുരപുംഗവൻ
മതിയതിന്നതി നന്മയെഴുന്നവൻ
ചിതമൊടിപ്പൊഴുതെങ്ങു വസിപ്പതും? 31

അമ്പോടിതാ നമ്മുടെ പൂര്‍വ്വജന്റെ
ഗംഭീരമാകും ധ്വനി കേട്ടിടുന്നു
വമ്പേറിടും ബുദ്ധി കലര്‍ന്നിടുന്നീ
നമ്പൂരിയും വന്നുവിതെന്നു നൂനം. 32

പട്ടന്മാരൊടുകൂടി
ച്ചേട്ടനിതാ വേഗമോടുമെത്തുന്നു.
കോട്ടമതെന്നിയെ നൊമ്മൾ-
ക്കൊട്ടും വൈകാതെ പോകതന്നെ ഗുണം 33

വിഷ്കംഭം കഴിഞ്ഞു.

താരേശാദി ഗ്രഹങ്ങൾക്കുടയൊരു വിപുല-
ശ്രീയശേഷം മുടിയ്ക്കു-
ന്നോരിച്ചണ്ഡാംശുവാകും സകലഭുവനസ-
ഞ്ചാരിയായോരു വിദ്വാൻ
പാരം ഗാസഞ്ചയത്തെദ്ദിശി ദിശി വിതറീ-
ടുന്നമൂലം രസിച്ചി-
ന്നേരം വല്ലാതെ കണ്ടീ ജ്ജലജതതി ചിരി-
യ്ക്കുന്നു. ചിക്കന്നിദാനീം 34

പാരിച്ച വേഗമൊടു പാരിനെഴുന്ന നല്ല
സാരം മുടിച്ചിടുമൊരീ ജ്ജലജാതനാഥൻ
പാരാതുയര്‍ന്ന പദമായതിൽ നില്ക്കയാലീ-
നേരം തപിച്ചു വലയുന്നു ജനങ്ങളെല്ലാം 35

നീരജ ബാന്ധവനധുനാ
നീരാഴിയിൽനിന്നു തന്നുടെ കരത്താൽ
സാരമെടുത്തതു വിരസ-
ന്മാരിൽ സ്വേദച്ഛലേന ചേര്‍ക്കുന്നു 36

രണ്ടാമങ്കം കഴിഞ്ഞു.

മൂന്നാമങ്കം

പാരിയ്ക്കും മാരി മഞ്ഞാതപമതിഭയദം
രോഗമൊട്ടല്ല ദുഷ്ട-
നാരെന്നോരൊവിപത്തിന്റെ പ്രതിവിധിയതു
ചെയ്തീടുവാൻ ശക്തിയെന്ന്യെ
പാരം ദേഹം ചടച്ചു ശിവശിവ!! വളരു
ക്ഷുത്തിനാൽ മൈ തളര്‍ന്നും
ദാരിദ്രക്കാർ കഴങ്ങുന്നിതു മലിനതയോ-
ടസ്തമാനാപമാന 37

സമ്പന്നന്നു ദരിദ്രഭാവമണകിൽ
ചേരും മഹാസങ്കടം
മുമ്പിൽ തന്നെ ദരിദ്രനായ പുരുഷ
ന്നോര്‍ക്കുമ്പോളുണ്ടായ്‍വരാ
വമ്പേറും പലകാഴ്ച കണ്ടതിരസം
കൈക്കൊണ്ടവന്തന്റെ ക-
ണ്ണമ്പിൽപ്പിന്നെ നശിയ്ക്കിലേന്തു മഴല -
ജ്ജാത്യന്ധനുണ്ടാകുമോ? 38

നന്നാവണം കറികളൊക്കെയുമേറ്റ,മായ-
തിന്നായ് കറിയ്ക്കു ചിതമാകിയ വസ്തുവെല്ലാം
അന്നന്നു തോപ്പുകളിൽനിന്നു പറിച്ചിടേണ-
മെന്നായിരുന്നു നിയമം ദൃഢമിങ്ങു പണ്ടു് 39

ചാരുശ്രീ ചെറുമുത്തൊടൊത്തരി മഹാ
ധാരാളമുണ്ടായ്‍വരും,
തൈരും നെയ്യുമൊടുങ്ങുകില്ല ഗുണമു-
ള്ളെളെളണ്ണയും വെണ്ണയും
ഓരോരൊ തരമുപ്പിലിട്ടതുകളി-
ങ്ങഞ്ചെട്ടു കൂട്ടം സദാ-
ചേരും സര്‍വജനത്തിനും രുചിയതുൾ-
ക്കൊണ്ടോരു കൊണ്ടാട്ടവും 40

നൽത്തേൻ, ശക്കര, പഞ്ചസാര, കദളീ-
പക്വം, വെളിച്ചെണ്ണ, മൂ-
പ്പെത്തീടുന്നൊരു തേങ്ങയെന്നിവകളും
താംബൂല പൂഗാദിയും,
കൊത്തമ്പാലരി, കാപ്പി, നല്‍ത്രിഫലംചുട്ടാ
ക്കി,ന്തുപ്പു,കര്‍പ്പൂരമെ-
ന്നത്യാവശ്യമതാം മരുന്നുകളു
മിങ്ങുണ്ടാകുമെല്ലാപ്പൊഴും 41

പണ്ടത്തല ലൌകികങ്ങളെയുമാ
ഭുക്ത്യാദിതൻ നന്മയും
കൊണ്ടാടിക്കുതുകത്തൊടോര്‍ത്തു പലരും
വന്നിങ്ങ കേറും വിധൌ
ഉണ്ടീടുന്നതിനും ഞെരുക്കമെഴുമി-
ക്കാലത്തു സര്‍വ്വവുംനിന-
ച്ചുണ്ടാകും വ്യസനത്തിനാലെവനമുൾ-
ക്കാമ്പിന്റെ കമ്പം വരും 42

കൊച്ചുരാമക്കുറുപ്പിന്നീ
യുച്ചക്കമ്പം പിടിയ്ക്കുവാൻ.
നിശ്ചയം, ഹേതു നീയ്യിപ്പോൾ
തീര്‍ച്ചയാക്കിയതല്ലടോ 43

കളിയിൽ ബാലജനത്തിന്നു,
ചെളിയിൽ പന്നിയ്ക്കും, പൊടിയിലാനയ്ക്കു്,
അളവില്ലാത്തൊരു കൊതിയു-
ണ്ടളികുഴൽമണിമാര്‍ക്കു നല്ല പണ്ടത്തിൽ 44

മാനം കലര്‍ന്ന സഹപാഠികളായ രാമ-
മേനോൻ, പണിയ്ക്കരഥ ശങ്കരനാമധേയൻ
ദീനം വെടിഞ്ഞിവരൊടൊത്തു തകര്‍ത്തിതാ ന-
ല്ലാനന്ദഭാവമൊടുമോപ്പ വരുന്നു വേഗാൽ 45

വിഷ്കംഭം കഴിഞ്ഞു.

ഊനം വെടിഞ്ഞൊരഴൽകൊണ്ടു മനസ്സുമാറി
ദ്ദീനം പിടിച്ചൊരു വയസ്യനുഴന്നിടുമ്പോൾ
ആനന്ദമോടധികമായ്‍ത്തലയും കുണുക്കി
ത്താനെന്തടോ ഹ-ഹ-ഹ-യെന്നു ചിരിച്ചിടുന്നു 46

വല്ലാതെയുണ്ടഴലിനിയ്ക്കു;മതെങ്കിലും കേൾ,
മെല്ലെന്നിയാളുടയ പേമൊഴി കേട്ടിടുമ്പോൾ
നില്ലാതകണ്ടുവരുമച്ചിരിയൊന്നൊതുക്കാ-
നില്ലാ മിടുക്കിഹ നമുക്ക, ഹമെന്തു ചെയ്‍വൂ! 47

ഉന്മേഷം നന്മനീഷയ്ക്കുടയൊരു ഗുരുവും
കൂടി വാക്യങ്ങൾ നന്നായ് -
ത്തമ്മിൽച്ചേര്‍ത്തര്‍ത്ഥമോതുന്നതിനു വിരുതു പോ-
രാഞ്ഞു കഷ്ണിച്ചിടുമ്പോൾ
ചെമ്മേ വാക്യങ്ങൾ ചേർത്തിട്ടവയുടെ പൊരുളോ-
തീടുമീബുദ്ധിമാൻ താ-
നിമ്മട്ടിപ്പോൾ കഥിയ്ക്കുന്നിതു പലതുമസം-
ബന്ധമായെന്തു ചെയ്‍വൂ 48

മൂന്നാമങ്കം കഴിഞ്ഞു

നാലാമങ്കം

ക്രൌര്യം, കൌടില്യഭാവം, കുസൃതിയിലധികം
കൌശലം, ദുന്നയത്തിൽ
സ്ഥൈര്യം, ദുര്‍ബുദ്ധിയെന്നുള്ളിവകൾ കലരുമീ
ക്കുള്ള നമ്പൂരിതന്നെ
കാര്യസ്ഥന്മാരശേഷം കഴലിണ കളവി-
ല്ലാതെ ക്രൂപ്പും ഭവാന്താ-
നാര്യ ശ്രീപൂര്‍ണ്ണ! കാണുന്നതു സമുചിതമാ-
ണെന്നു തോന്നുന്നതില്ല. 49

ദോഷജ്ഞനാകിയ ഭവാനധുനാ പറഞ്ഞ
ദോഷങ്ങളീ മധുരമംഗലവിപ്രനില്ല.
ദോഷങ്ങൾ തീര്‍ക്കുവതിനായ് പലമട്ടിലുള്ള
വേഷങ്ങൾ കെട്ടുമിവനെന്നുതിനുള്ള ദോഷം? 50

വേരു മരുന്നല്ലാതി-
ല്ലോരുകിലക്ഷരമമന്ത്രമായില്ല.
ആരുമയോഗ്യനതില്ലീ
പ്പാരിൽ; പക്ഷേ, ഞെരുക്കമിവചേര്‍പ്പാൻ 51

വിഷ്കംഭം കഴിഞ്ഞു.

മട്ടൊക്കും വാണി! നാരായണി! ഗുണമിയലും
വല്ലഭേ! നല്ലസൌഖ്യം
കുട്ടിയ്ക്കില്ലെന്നതുണ്ടോ, കരടു വളയിവ-
യ്ക്കറ്റകുറ്റങ്ങൾ വന്നോ?
തട്ടിക്കേറ്റം തകര്‍ത്തോ, പറക, വലിയൊര-
മ്മാമനിക്കാലമെന്തീ-
മട്ടിൽക്കഷ്ടം! മുഖത്തിൽ തെളിവു കുറയുവാൻ
കാരണം ചാരുശീലെ? 52

മുഖപ്രസാദം കലരാതെ ചന്ദ്ര-
മുഖി! പ്രിയേ! കേൾ ഇവിടത്തിലേവം
സുഖംവിനാ നീയ്യമരുന്നകണ്ടു
സഖേദമാകുന്നു മദീയ ചിത്തം 53

"ഞാൻ താനിക്കാര്യദോഷം കളവനഖില"മെ-
ന്നായ് ഭവാൻ ചൊൽകയാലി-
ക്കോന്തമ്മാമൻ കളിയ്ക്കുന്നതു കരുതി നമു-
ക്കല്ലലിന്നില്ല തെല്ലം
ഭ്രാന്തായിട്ടോപ്പയേവം ശിവ ശിവ! പലതും
ഗോഷ്ഠികാട്ടുന്നു കണ്ടി-
ട്ടേന്തും സല്ലാപമോടെൻ മനതളിരുരുകീ-
ടുന്നു വാടുന്നു ദേഹം 54

ചൊല്ലാര്‍ന്ന സൽഗുണഗണങ്ങളിണങ്ങു മോപ്പ-
യ്ക്കല്ലൽപ്പെടും വലിയ കമ്പമതെന്നമൂലം
നല്ലോരു ശീലം അതിബുദ്ധി മിടുക്കുമെന്നി-
തെല്ലാം വൃഥാ ഫലമതായിഹ തീന്നുവല്ലൊ 55

ഇന്നുള്ളീവ്യവഹാരമായതു ജയി-
പ്പാൻ ദുർഘടം, നൽക്കട-
ത്തിന്നോര്‍ത്താലവസാനമില്ല; പരമീ
നമ്പൂരിയും കള്ളനായ്;
എന്നുള്ളാധിയതാണു മൂലമിഹനി-
നോപ്പയ്ക്കും കമ്പംവരാ-
നെന്നാണെന്നുടെ പക്ഷം; ഏണമിഴിമാർ
മാനിച്ചിടും മാനിനി! 56

പാപ്പച്ചവും പപ്പടവും തരാം നൽ
പാപ്പം തരാം പീപ്പിയതും തരാംഞാൻ
കുപ്പായവും തൊപ്പിയതും തരാം ന-
ല്ലപ്പം തരാം; നീ വരികെന്റെ കുട്ടാ! 57

എടശ്ശേരിവിപ്രൻ, പുഴശ്ശേരിവിപ്രൻ,
പടുത്വം പെടും മേനവൻ മാധവാഖ്യൻ
മിടുക്കേറിടും വാരിയൻ കൃഷ്ണനെന്നീ
വിടന്മാരൊടൊന്നിച്ചിരിയ്ക്കുന്നു കോന്തൻ 58

സാരം വച്ചു പറഞ്ഞിടും മൊഴി, രതി-
യ്ക്കുള്ളാഭ കട്ടീടുവാ-
നാരംഭിച്ചിടുമംഗമെന്നിവയെഴും
നിൻ കാന്തിയെക്കാണ്കയാൽ
സ്വൈര്യം കൊച്ചുകുരംഗലോലനയനേ!
കഞ്ജാസ്ത്രനും ഞാനുമായ്
പാരം വച്ചരശാണു്; മൂടുവതിനായ്
പോർ കൊങ്ക പോരും തവ. 59

വണ്ടോടും കുഴലാൾമണേ! ഗുണഗണം
കൊണ്ടെൻ മനം പണ്ടു നീ
കൊണ്ടാടും കുതുകം കലര്‍ന്നു തരസാ
മയ്ക്കണ്ണി! കയ്ക്കൊൾകയാൽ
തണ്ടോടൊത്തമരുന്ന ചിത്തഭവനാം
ചെന്താർ ശരൻ താതനെ
ക്കണ്ടീടാഞ്ഞു കയര്‍ത്തിടുന്നിതിഹനിൻ
കാലാണാരാലംബനം 60

പോകുന്നേൻ പുതുമേഘവേണി! കടുമാ-
ഹാണിയ്ക്കുമെൻ കാര്യമൊ-
ന്നാകുന്നീല നമുക്കുജോലി പലതു
ണ്ടില്ലത്തു മല്ലേക്ഷണെ!
ചാകുന്നോളവുമുള്ളിലിങ്ങിനെ മനോ-
രാജ്യം വിചാരിച്ചു നിൻ
പാകം നോക്കിയിളിച്ചിനിയ്ക്കിഹവൃഥാ-
വാസം പ്രയാസം പ്രിയെ! 61

ബ്രഹ്മാവീശൻ മുകുന്ദൻ മുതലഖിലരെയും
ശങ്കയെന്യെ ജയിച്ചി-
ബ്രഹ്മാണ്ഡൈകാധിപത്യത്തൊടുവിലസിനപൂ
വ്വമ്പനമ്പെയ്തിടുന്നു;
ബ്രഹ്മന്താനാണ സത്യം; മമകഥ കഴിയും
നിൻകുചാശ്ലേഷമാമി-
ബ്രഹ്മാസ്ത്രത്തെ പ്രയോഗിപ്പതിനൊരു നിമിഷം
വൈകിയെന്നാകിലിപ്പോൾ 62

ജീവൻ പോകുന്നതിന്നായ് മുനയതിനധികം
മൂർച്ച കൂടുന്ന ബാണം
പൂവ്വമ്പൻവന്നു രാവും പകലുമിഹ പൊഴി-
യ്ക്കുന്നു, വായ്ക്കുന്ന രോഷാൽ;
ആവൂ! പെയ്യുന്നിതേറ്റം മഴയതു മിനിയൊ-
ന്നോണമുണ്ടീടുമോ ഞാ-
നാവോ, എന്നായി കഷ്ടം, കരുതുക
മറിമാൻ കണ്ണി! കാരുണ്യമെന്നിൽ 63

കേളിപ്പോൾ മകരദ്ധ്വജോഗ്രമകരം
ചേരുന്ന ശൃംഗാരമാം
കേളിപ്പെട്ടു വിളങ്ങിടുന്ന പുഴയിൽ
ക്കല്ല്യേ! കളിച്ചീടുവാൻ
മേളപ്പെട്ടു നടത്തിടും മമ മന-
സ്സാം വഞ്ചി നിഞ്ചില്ലിയാ-
മോളപ്പാത്തിയിൽ വീണുപോയിനിയുടൻ
മുങ്ങിക്കിടുങ്ങാച്ചിയാം 64

നിന്മൈ പുൾകുന്നതിനായൊരു തരമുളവാ-
കാഞ്ഞു കാഞ്ഞിങ്ങു ബുദ്ധി
യ്ക്കുന്മേഷം വിട്ടു കാമക്കടലുടെ നടുവിൽ
പ്പെട്ടു വീര്‍പ്പിട്ടിടുന്നേൻ;
നന്മാൻനേർകണ്ണിയാളേ! പകലിരവുമൊഴി-
യ്ക്കാത്ത നിൻ വല്ലഭൻ ത-
ന്നമ്മാമൻ ചത്തതിപ്പോൾ കളമൊഴി കളിയ
ല്ലെന്റെ ദൈവാനുകൂലം. 65

ധന്യേ! തവ പ്രിയനെഴും പണി ദൂരെയായ-
തിന്നത്തെ നാൾ മുതലതെന്നൊരു വാര്‍ത്തകേട്ടേൻ;
നിന്നെക്കൊതിച്ചു മരുവുന്ന നമുക്കു കാര്യം
നന്നായി വന്നിതു തിരിഞ്ഞുമറിഞ്ഞൊടുക്കം 66

മൂപ്പെത്താത്തളിരൊത്ത നിൻ തനുലഭി-
ച്ചീടാത്തൊരെന്നോടുടൻ
മൂപ്പിച്ചങ്ങിനെ കൂര്‍പ്പെഴും ശരമുതൃ-
ത്തെത്തുന്നു ചിത്തോത്ഭവൻ.
പാപ്പോയെന്നു പറഞ്ഞുകൊണ്ടു കളിയിൽ-
ത്തുള്ളുന്നൊരാഭീരുപോ-
ലേഭ്യൻ നിൻ പതിയിന്നിടഞ്ഞതഴകിൻ-
വിത്തേ! കുരുത്തം മമ. 67

കൂനും ക്രൂരതയും കുശുമ്പുമിയലും
നിന്മുത്തി മൂത്തോരുനൽ
ദ്ദീനം കൊണ്ടു മരിച്ചതും കടിയനാ-
മപ്പട്ടിയെ വിറ്റതും
ആനഭ്രാന്തൊടുമങ്ങമിങ്ങമനിശം
പൂരത്തിനായ് നിൻവരൻ
താനോടുന്നതുമെന്റെ ശുക്രദശയെ-
ന്നല്ലാതെ ചൊല്ലാവതോ? 68

മുഷ്കൻ നിന്നുടെ വല്ലഭൻ തവ സമീ-
പത്തിങ്കൽ വന്നെങ്കിൽ മാം
ഞെക്കിക്കൊല്ലുമമക്കനെന്നതു കണ-
ക്കല്ലായ്ക്കിൽ മുല്ലായുധൻ;
തക്കക്കേടിതുകൊണ്ടു ഞാനഴൽ പെടു
ന്നേനിന്നു നിൻ കാന്തനീ-
ത്തര്‍ക്കപ്പെട്ടൊരു നമ്പർ വന്നതറികെ-
ന്നായുർബ്ബലം കേവലം. 69

നനിര്‍ണ്ണയസ്സുന്ദരവര്‍ണ്ണ നാസികാ
കപോല ദന്താധര ഫാലലോചനാ
വരാംഗനാ ചുംബനലാഞ്ചനം തുയ
ന്മുഖാരവിന്ദസ്യത ദേവഭൂഷണം 70

അവാര്യയുക്ത്യാ പ്രതിവാദി ഭീഷണം
നഭാഷണം, നോജ്വലകുണ്ഡലാദികം
സദര്‍ച്ചിതം യച്ശിവനാമ മംഗളം
മുഖാരവിന്ദസ്യത ദേവഭൂഷണം 71

നകുണ്ഡലം കാഞ്ചനരത്ന നിര്‍മ്മിതം
ന ചിത്രകം ചന്ദനപങ്ക ഭാസുരം
ഋതം മിതം യൽതുലിതാമൃതംവചൊ
മുഖാരവിന്ദസ്യത ദേവഭൂഷണം 72

നാലമങ്കം കഴിഞ്ഞു.

അഞ്ചാമങ്കം

കേടറ്റ ശോഭയൊടിതാ പുതുതായ ശീമ--
യോടിട്ടു പൊങ്ങിയൊരു മാളിക കാണ്മതില്ലേ?
നാടൊക്കയു പുകളെഴും “കൊമരപ്പറമ്പാം”
വീടാണതെന്നു വിരവോടു ധരിച്ചുകൊൾക 73

ആലസ്യമോടു ചെന്നീ-
ക്കാലം കൃഷ്ണക്കുറുപ്പു ശുഭശീലൻ
നാലഞ്ചാളുകളൊത്തി-
ക്കോലായ്പുറമതിലിതാ വസിയ്ക്കുന്നു 74

ഗോവിന്ദമേനോൻ.

അന്തംകൂടാതെ കാളും കൊടിയൊരു കടമാം
തീയ്യിൽ വീണിട്ടുമേവം
വെന്തീടാതിക്കുഡുംബം പരിചൊടു പരിപാ-
ലിച്ചതങ്ങുന്നുതന്നെ
കോന്തച്ചേട്ടന്റെ ബുദ്ധിക്ഷയവുമധികമായ്
ക്കൊച്ചുരാമന്നുചേരും
ഭ്രാന്തു തഞ്ചത്തിനാൽ തീര്‍ത്തതുമറികഭവാൻ
തന്നെ ഭാഗ്യാംബുരാശെ! 75

ന്യായത്താലിഹ സൃഷ്ടി, രക്ഷ, ലയമെ-
ന്നീ മൂന്നു സർവ്വത്തിനും
മായാത്യത്ഭുത ശക്തിയാൽ പരമണ-
ച്ചീടുന്നു കേടെന്നിയെ
കായം പാതി ശിവയ്ക്കു നൽകിയ ജഗ-
ന്നാഥൻ ഹരൻ; ചട്ടുക-
പ്രായം മറ്റു ജനങ്ങളാസകലമെ-
ന്നാണെന്മതം സന്മതൈ! 76

ശിവ! ശിവ ശിവ! കഷ്ടം കഷ്ടമേ! പാപമിപ്പോ-
ളവധിയതു വെടിഞ്ഞിട്ടുണ്ടെനിയ്ക്കും നിനയ്ക്കിൽ
ശിവകരതര വേദാന്തത്തെ നിന്ദിച്ചിടുന്നോ-
രിവിടമതിൽവിചാരംവിട്ടുഞാൻ പെട്ടുവല്ലൊ! 77

മാലെന്യേ ബാലഗോപാലക ഗണയുതനായ്
കാലി മേച്ചും കളിച്ചും
കാലന്നൊക്കുന്നഘൻ തന്നരിയൊരുടൽ പൊളി-
ച്ചും ഭുജിച്ചും രസിച്ചും
ചേലൊക്കും വിശ്വരൂപം വിരവൊടുവിധിയെ -
ക്കാട്ടിയും നൽ സ്തവൌഘ-
ത്താലുൾക്കാമ്പങ്ങലിഞ്ഞും മരുവിന ഹരിയെൻ
ദുഷ്കൃതം പോക്കിടേണം 78

ഡംഭേറിടുന്ന മധു കൈടഭ നാശദാത്രി!
ശംഭുപ്രിയെ! മഹിഷമർദ്ദിനി ലോകനാഥെ!
സുംഭാന്തകേ! ഹതനിസുംഭ മഹാസുരേ! മെ-
ജൃംഭിച്ചിടുന്ന കലുഷം കളകാഽഖിലേഢ്യേ! 79

വാഗീശാച്യുത മുഖ്യനിർജ്ജരനതൻ
വിഘ്നേശ്വരോല്പാദകൻ
യോഗീശാർച്ചിതനീശ്വരൻ ഗിരിസുതാ
കാന്തൻ കൃതാന്താന്തകൻ
നാഗേശാമല ഭൂഷണൻ യതിവരാ-
കാരം ധരിച്ചിട്ടു ഭൂ-
ഭാഗേ ശാന്തരസം നടത്തിയ ശിവ-
ന്തന്നെത്തൊഴുന്നേനഹം 80

ശ്രീവേദാന്താദി വിദ്യാഗണമഖിലവുമ-
ങ്ങുരിച്ചീടുവാനായ്
ദേവൌഘപ്രാര്‍ത്ഥനത്താൽ അമിതഗുണമെഴും
കാലടിക്ഷോണിതന്നിൽ
ആവോളം ഭക്തിചേരും ശിവഗുരുസുതനായ്
ശങ്കരാചാര്യനായി-
ട്ടാവിർഭൂതൻ മഹേശൻ കളയണമഴകോ-
ടുള്ളിലിങ്ങുള്ള ദോഷം 81

ബാല്യത്തിൽ ക്ഷുത്തുചേരും സഖിഗണയുതനായ്
വിത്തമില്ലാത്തൊരില്ല-
ത്തുല്ലാസാൽച്ചെന്നു യാചിച്ചളവിലവർ കൊടു-
ത്തോരു നെല്ലിയ്ക്കതിന്നു്
കല്യാണ“ശ്രീസ്തവം"തീര്‍ത്തവിടമതിലുടൻ
പൊന്നു വർഷിച്ചദേവൻ
ചൊല്ലേറും ശങ്കരാഖ്യൻ കളയണമഴകോ-
ടുള്ളിലിങ്ങുള്ള ദോഷം 82

“നക്രം വിട്ടീടുമെങ്കിൽ ത്തനയ! ഝടിത നീ
സന്യസിയ്ക്കെ”ന്നു മാതാ-
വുൾക്കമ്പം പൂണ്ടുരച്ചോരളവതിൽ മുതല-
യ്ക്കാശു മോക്ഷം കൊടുത്തു്
വെക്കം ഗോവിന്ദഭിക്ഷൂത്തമനൊടു ചിതസ
ന്യാസവും വാങ്ങിയോരാ
മുക്കണ്ണൻ ദേവദേവൻ കളയണമുടനി
ങ്ങുളിലുള്ളോരു ദോഷം 83

ശ്രീമൽ ബ്ഭാഷ്യം ചമച്ചും, ചതുരമൊഴികളാൽ
അത്ഭുതം വ്യാസനേകി-
ട്ടാമോദാലാത്മവിദ്യാസ്ഥിതി ധരണിയിലു
ണ്ടാക്കിയും, വാക്കുകൊണ്ടു്
ധീമാനാം"മണ്ഡനൻ" തന്നുടയ മതിമദ
പോക്കിയും കീർത്തി പൂണ്ടോ-
രോമൽബ്ബാലേന്ദുചൂഡൻ കളയണ മഴകോ-
ടുള്ളിലിങ്ങുള്ള ദോഷം 84

“ഇപ്പോളിമണ്ഡനന്തന്നുടയ മഹിഷിയാം
വാണിയേയും ജയിപ്പാൻ
ചൊല്ലൊങ്ങും കാമശാസ്ത്രം സകലവുമറിയേ-
ണം നമുക്കെ”ന്നുറച്ചു
അപ്പോൾത്താനേ മരിച്ചോരമരപതി നൃപൻ
തന്റെ നല്ലോരു പൂമൈ-
യ്യുൾപ്പുക്കോരിന്ദു ചൂഡൻ കളയണമഴകോ-
ടുള്ളിലിങ്ങുള്ള ദോഷം 85

കൂറൊക്കും ശിഷ്യരൊടൊത്തുലകിടമഖിലം
വെന്നു സര്‍വ്വജ്ഞപീഠം
കേറിക്കാശ്മീരദേശേ വിരവൊടു വിലസും
മണ്ഡപം പുണ്യമാക്കി
ആറാടും മൌലിയോടൊത്തനിശമമിതകാ-
രുണ്യപൂരത്തിൽ നന്നാ-
യാറാടുന്നോരുദേവൻ കളയണമഴകോ-
ടുള്ളിലിങ്ങുള്ള ദോഷം 86

ചിത്തത്തിൽബ്ഭക്തിചേരുംജനമതിനമല
ജ്ഞാനമേകീട്ടു പിന്നെ
ദ്ദത്താത്രേയാഖ്യനാകും മുനിതിലകനോടൊ-
ന്നിച്ചു മന്ദിച്ചിടാതെ
ഉത്തുംഗശ്രീവിളങ്ങം രജതഗിരിയതിൽ
ചെന്നു ശര്‍വ്വാണി തന്നോ-
ടൊത്താനന്ദിയ്ക്കു മീശൻ കളയണമഴകോ-
ടുള്ളിലിങ്ങുള്ള ദോഷം 87

എന്നാൽ, വിദ്യാഭ്യാസം
നന്നെന്നുള്ളോരു നല്ലൊരുപദേശം
തന്നിടുമീശ്ശങ്കരഗുരു
ധന്യചരിത്രം പവിത്രമതി ചിത്രം 88

നാകേന്ദ്രസൽഗുരു സമാന! ഭവാൻ കടങ്ങ-
ളാകെക്കളഞ്ഞുമഥ സൽക്കഥയെപ്പറഞ്ഞും
ലോകദ്വയത്തിലുമിനിസ്സുഖമായിരിപ്പാൻ
പാകത്തിലാക്കിയടിയന്നിഹ വേണ്ടതെല്ലാം 89

ലോകം നിറഞ്ഞിടണമിക്കവിനായകന്മാർ
തൂകുന്ന നന്മധുരമംഗല ഭാഷിതത്താൽ
ശോകങ്ങൾ തീര്‍ത്തു ശിവവല്ലഭയായ ഗൌരി
ലോകങ്ങളാസകലമയ്ബൊടു കാത്തിടേണം 90

അഞ്ചാമങ്കം കഴിഞ്ഞു.
മധുരമംഗലം ഭാഷാനാടകം
സമാപ്തം
>