കൊടുങ്ങല്ലൂർ
പുരാരി പുണരും പുണ്യ
പുരാണശ്രുതിസാരമേ!
നിരാകരിച്ചു രക്ഷിക്ക
നിരാതങ്കമഘങ്ങളെ
താങ്കൾ അയച്ചതന്ന കേരളവര്‍മ്മവിലാസം പുസ്തകം കിട്ടി ബോധിച്ചു. പക്ഷേ ഇതൊരു ശതകമാക്കിയതു കേവലം കവിതയിലുള്ള പിശുക്കായിപ്പോയി എന്നാണ് നമുക്ക് മുമ്പിലൊരഭിപ്രായം പറവാൻ തോന്നുന്നതു്. എന്തെന്നാൽ
വിസ്താരം കലരുന്ന കാവ്യനിലയാ-
യല്ലായ്കിലോ നാടക-
പ്രസ്താവപ്പടിയായ് പടച്ചിഹ പര-
ത്തേണ്ടുന്നൊരിസ്സൽക്കഥ
അസ്താശങ്കമൊതുക്കിവെച്ചു ശതക-
പ്രായത്തിലുണ്ടാക്കിയാൽ
ശസ്താനേകരസജ്ഞർ കാണുമളവിൽ-
ക്കണ്ണിൽ പിടിച്ചീടുമോ?
എന്നാലും തവ സംസ്കൃതം കവിതയാ-
യൊന്നാമതുണ്ടായൊരീ
യൊന്നാംക്ലാസു വിധിക്കു മറ്റൊരുവനാ-
രപ്പീൽ വിധിച്ചീടുവാൻ?
എന്നാണങ്ങയിലിഷ്ടമേറ്റമിയലും
കൂനേഴനോതുന്നതി-
ങ്ങെന്നാലങ്ങിനെയാട്ടെയെന്നു ശരിവെ-
യ്ക്കുന്നുണ്ടു ഞാനും സഖേ!
കൂനേഴൻ ഇവിടെ ഒരു പാഠശാലയിൽ മാസ്റ്റർജോലി നോക്കിവരുന്നു. വിശിഷ്യ ആയാൾക്കു രാവും പകലും ബുദ്ധിമുട്ടുതന്നെ.
വയസ്യനാമായവനച്ഛനേറ്റം
വയസ്സുകാലത്തൊരു വാതരോഗം
ലയിച്ചുകണ്ടിട്ടരികത്തുതന്നെ
നയിച്ചുപോരുന്നിതു പിന്നെ നേരം
അതുകൊണ്ടും ഇതുകൊണ്ടും അമ്പലപ്പടികൊണ്ടും ആയാൾക്കിരിക്കപ്പൊറുതിയില്ലായ്കയാലാണ് താങ്കൾക്കുപോലും എഴുത്തയയ്ക്കാത്തതെന്നു പ്രതിനിധിസ്ഥാനത്തു ഞാൻ പറയുന്നു.