8

ഏതും ഭേദിച്ചിടാതേ സുഖവുമസുഖവും
പങ്കുകൊള്ളുന്ന സഖ്യാ
ഹേതും ചേതോഗതാധേർ ധ്രുവമിയമനുയു-
ക്താ വദേദേവ ബാലാ,
കാതും കണ്ണും തൊടീച്ചങ്ങനെ മുഹുരനയാ
സസ്പൃഹം വീക്ഷിതോപി
ശ്രോതും കാതര്യവാനസ്മ്യഹമിവളുരചെ-
യ്യുന്നതെന്തെന്നിദാനീം.

[ലജ്ജയോടുകൂടി]

തോഴീ! തപോവനത്തെ രക്ഷിക്കുന്ന ആ രാജർഷി എന്നാണോ എന്റെ ദൃഷ്ടിമാര്‍ഗ്ഗത്തെ പ്രാപിച്ചു -

[ലജ്ജകൊണ്ടു വിരമിക്കുന്നു]

ഇഷ്ടതോഴീ! പറകതന്നെ പറകതന്നെ

അന്നുമുതൽ അദ്ദേഹത്തിനെക്കുറിച്ചുള്ള അഭിനിവേശം ഹേതുവായിട്ടു ഞാൻ ഈ അവസ്ഥയെ പ്രാപിച്ചിരിക്കുന്നു.

[സന്തോഷാതിശയത്തോടുകൂടി]

കേൾക്കേണ്ടതു കേട്ടു.

സന്താപത്തിൻ ഹേതുവായിത്തീർന്നതും മേ
ചെന്താർബാണൻ തൽപ്രശാന്തിക്കുമായീ
ജന്തുവ്രാതത്തിന്നു നൈദാഘകാല-
സ്യാന്തേ മേഘശ്യാമമാം വാസരം പോൽ.

അതുകൊണ്ടു നിങ്ങൾക്കു സമ്മതമാണെങ്കിൽ ആ രാജർഷിക്ക് എന്റെ മേൽ കരുണ തോന്നുന്നതിനുള്ള മാർഗ്ഗം ഉണ്ടാക്കണം. അല്ലെങ്കിൽ താമസിക്കാതെ എന്റെ ഉദകക്രിയ ചെയ്യേണ്ടിവരും.

ഈ വാക്കു സകലസംശയത്തേയും കളയുന്നു.

[അപവാര്യ]

അനസൂയേ! ഇവളുടെ കാമം കവിഞ്ഞ സ്ഥിതിയിൽ ആയിരിക്കുന്നു. ഇനി കാലതാമസം പാടില്ല. ഇവൾക്ക് അഭിനിവേശം ജനിച്ചിരിക്കുന്നതു പൌരവവംശത്തിന് അലങ്കാരഭൂതനായിരിക്കുന്ന മഹാപുരുഷനിലാണല്ലൊ. അതുകൊണ്ടു നാം അതിനെ അഭിനന്ദിക്കണം

പ്രിയംവദേ! നീ പറഞ്ഞതു ശരിയാണ്.

[പ്രകാശം]

ശകുന്തളേ! നിനക്കു സർവഥാ അനുരൂപനായ പുരുഷനിൽ അഭിലാഷം ജനിച്ചതു ഭാഗ്യം തന്നെ. മഹാനദി സമുദ്രത്തെ വിട്ടു മറ്റെവിടെ ചെന്നു ചേരുന്നു?

തേൻമാവല്ലാതെ തളിർത്തിരിക്കുന്ന മുല്ലയ്ക്കു ചേരുന്നതിനു യോഗ്യമായ വൃക്ഷം മറേറതാണ്?

വിശാഖാനക്ഷത്രങ്ങൾ രണ്ടും ചന്ദ്രലേഖയേ അനുവർത്തിക്കുന്നതിൽ എന്താശ്ചര്യം?

എന്നാൽ ഇനി നമ്മുടെ ഇഷ്ടതോഴിയുടെ മനോരഥത്തെ ശീഘ്രമായും ഗൂഢമായും സാധിപ്പിക്കേണ്ടതിന് എന്താണുപായം?

ഗൂഢമായിട്ടെങ്ങനെ എന്നേ ആലോചിക്കാനുള്ളു. ശീഘ്രമായിട്ടാകുന്നതിനു പ്രയാസമില്ല.

അതെന്താണ് ?

ആ രാജർഷി ഇവളെ സ്നേഹത്തോടുകൂടി നോക്കുന്നതുകൊണ്ടു തന്റെ അഭിലാഷത്തെ സൂചിപ്പിക്കുന്നതും ഈയിടെ ഉറക്കം ഇല്ലാതെ പരവശനായിരിക്കുന്നതും കാണുന്നില്ലയോ?

സത്യം. എന്റെ അവസ്ഥ ഇപ്പോൾ അങ്ങനെ തന്നെ.

നിത്യം രാത്രിയിലന്തരാർത്തി പെരുകി-
പ്പെട്ടെന്നു ചുട്ടീടവേ
ഹസ്താന്തേ പൊഴിയുന്ന ബാഷ്പവിസരൈർ
വിച്ഛായരത്നീകൃതം,
അത്യന്തം മറയാത്ത ഞാണടികിണ-
ത്തോടേ മണീബന്ധനാൽ
സ്രസ്തം സ്രസ്തമിദം സുവർണ്ണവലയം
പ്രത്യാനയിക്കുന്നു ഞാൻ.