ഇങ്ങിനെയിനിയും തോറ്റിടു-
മങ്ങനുജൻ ഞാൻ കളിച്ചിടുന്നേരം;
അംഗനമാരൊടു കാട്ടിന
ഭംഗി നരാധീശ! നമ്മൊടൊത്തിടുമോ? 12

മടക്കവും തേ ജയവും സഖേ! ക-
യ്യടക്കമാണെന്നിഹ തോന്നിടുന്നു;
മിടുക്കുവെച്ചൊട്ടു തിരുമ്മി നന്നായ് -
ക്കിടുക്കിയിച്ചുക്കിണി വിട്ടുകൊൾക. 13

അടക്കയിമ്പോടു കളിച്ചു,മാന-
മെടുക്കുകെന്നാലതിനെന്തു ദോഷം?
പൊടുക്കനെ വെച്ചു തിരുമ്മിയിട്ടു
കിടുക്കി വീട്ടീടുകിലെന്തു മാനം? 14

മടിച്ചിടാതങ്ങിനെ കണ്ടു കണ്ടു
പിടിച്ചിടും കൌശലജാലമെല്ലാം
പഠിച്ചതല്ലാ കളവെന്നു നാട്യം
നടിച്ചപേക്ഷിക്കുക ഭംഗിയാമോ? 15

എന്തൊന്നാണിതമന്ദകാന്തിയവിടെ-
ചിന്നുന്നതോര്‍ക്കുംവിധൌ?
ചന്തം ചിന്തിന മിന്നലിങ്ങിനെ വരാൻ -
വയ്യിന്നു രാവല്ലെടോ;
ചിന്തിച്ചപ്പൊഴറിഞ്ഞു സാരമിവിടെ -
ഗോവിന്ദനെക്കാണുവാൻ
ചെന്താർബാന്ധവനായിടുന്ന ഭഗവാൻ
വന്നീടുകായീടണം 16

സാത്യകിയോടും ചേർന്നതി-
ജാത്യമൊടും ചൂതുപൊരുതി വിരുതുകളും
വൃത്തിയിലോതിക്കൊണ്ടു ജ-
ഗത്രയനാഥൻ വിളങ്ങുന്നൂ. 17

അത്ഭുതമത്ഭുതമോര്‍ത്താൽ ചിൽപുരുഷനതായിടും ഭവച്ചരിതം!

കെല്പൊടു ഭഗവാനര്‍ക്കനു-
മിപ്പോൾ കാണ്മാൻ വരുന്നു തവ സവിധേ. 18

ശരി ശരി: ഭഗവാനാമര്‍ക്കനല്ലീമനുഷ്യൻ
വിരുതുടയൊരു സത്രാജിത്തുതാനായ്‍വരേണം;
പരമിവനുടെ വാക്കീമട്ടു കേട്ടിട്ടു വല്ലാ-
തൊരു മിഴിയടനേരം മാറി ഞാനും ഭ്രമിച്ചു. 19

കാരുണ്യം കലരും ത്രയീമയവപു-
സ്സാകുന്നൊരാദ്ദേവനെ-
പ്പാരം ഭക്തി വളര്‍ന്നുകൊണ്ടു വളരെ-
ക്കാലം ഭജിച്ചേനഹം;
സ്വൈരം ദാരസുതാദിയായ വിഷയ-
ഭ്രാന്തിൽ ഭ്രമിക്കാതെക-
ണ്ടാരംഭിച്ചതിലേറിയേറി ഭജനേ
നിഷ്കുഷയും നിഷ്ഠയും. 20

തുടങ്ങിടും കാര്യമതിങ്കലേതും
മുടങ്ങിടാതേ നിരുപിച്ചപോലെ
ദൃഢം മഹാനിഷ്ഠയൊടും നടപ്പോര്‍-
ക്കുടൻ മഹാത്മൻ! പറകെന്തസാദ്ധ്യം? 21

വളരെ വളരെ നാളീമട്ടു ഞാൻ സേവചെയ്തോ-
രളവു തെളിവു കൂടും പ്രീതിയോടെന്റെ മുമ്പിൽ
വെളിവിലജനനന്തൻ ചൊല്ലുകെന്തിഷ്ടമെന്നാ-
യൊളിവു ഹൃദി നിനച്ചിടാതെ ചൊന്നാൻ പ്രകാശം 22

നിനച്ചിടാതിങ്ങിനെ കണ്ടനേരം
ജനിച്ചൊരാനന്ദജബാഷ്പമോടും
അനേകവാരം പ്രണമിച്ച ലോകേ-
ശനേ വണങ്ങി സ്തുതിചെയ്തു നിന്നേൻ. 23

സദാ ഭവത്സേവയതൊന്നുമാത്രം
മുദാ സരോജപ്രിയ! ചെയ്യുവാൻ മേ
ഉദാരകാരുണ്യമുദിച്ചുവെന്നാ-
ലദാന്തസന്തോഷമതായി നൂനം. 24

"എന്നുടെ ബിംബമൊടൊപ്പം
മിന്നിടുമീമണി ഭവാനുനൽകുന്നൻ;
എന്നാൽ 'സ്യമന്തക'മതാ-
ണെന്നായറികിതിനു നാമമയി! ധീമൻ! 25

എന്നാലെട്ടെട്ടു ഭാരം കനകമിതു ദിന-
ന്തോറുമുണ്ടാക്കു,മെന്നും
നന്നായ് വന്നീടുമീയുത്തമമണിയണിയും
മാനുഷന്നത്രയല്ല,
തോന്നില്ലാ ദുര്‍ന്നയം ലേശവുമകമലരിൽ
സത്യധര്‍മ്മാദിനിഷ്ഠ -
യെന്നല്ലാം നന്മ കൂടും പരമുപരി ഗുണം
കണ്ടിടും വേണ്ടുവോളം.'’ 26

കേട്ടീടേണം ജഗത്തിൽ കൊടിയ ഗുണമെഴും
ശ്രേഷ്ഠവസ്തുക്കളെല്ലാം
കോട്ടം വിട്ടൊരു ഭൂമീപതിയുടെയവകാ-
ശത്തിലായുള്ളതത്രേ:
പിട്ടല്ലിന്നുഗ്രസേനക്ഷിതിപതിയവർകൾ-
ക്കീ മഹാരത്നമങ്ങു-
ന്നിഷ്ടത്തോടേ കൊടുത്തിടുക; പരമതു ധ-
ന്യാകൃതേ ന്യായമാകും. 27

ചോദിച്ചീടുന്നതോര്‍ത്താൽ ചതുരത കലരു-
ന്നോരു ഗോവിന്ദനാണുള്‍-
പ്രീതിഛായയ്ക്കു ദോഷം വരുമിതു തരികി-
ല്ലെന്നു ചൊല്ലുന്നതായാൽ;
ചേതം ചെറ്റല്ല നൽകീടുകി,ലിതു വിഷമം
തന്നെ, ഞാനെത്രകാലം
ചെയ്തോരീ ബുദ്ധിമുട്ടിന്നുടെ ഫലമപര-
ന്നേകിയാൽ ശോകമത്രേ. 28

തരുന്നതല്ലെന്നു തികച്ചുനേരേ
തുറന്നുചൊല്ലാൻ മടിയുണ്ടുതാനും;
വരുന്നതെല്ലാം വരുമിന്നു മിണ്ടാ-
തരം നമുക്കങ്ങു ഗമിക്കതന്നെ. 29

പ്രാജ്യമായ മണി കയ്യുവിട്ടുടൻ
രാജ്യപാലനു കൊടുപ്പതെങ്ങിനെ?
പൂജ്യരാകുമവരൊന്നിരക്കുകിൽ
പൂജ്യമെന്നു പറയുന്നതെങ്ങിനെ? 30

പാരം തീക്ഷ്ണതപൂണ്ട രശ്മിനിരയാ-
മാഗ്നേയ ബാണങ്ങളെ- പ്പാരെല്ലാമമരുന്ന ലോകരുടെ നേ-
രിട്ടായ് ചൊരിഞ്ഞങ്ങിനെ
ഘോരാകാരതയോടുമംബരമതാ-
മാജിസ്ഥലേ നിന്നുകൊ-
ണ്ടേറെപ്രൌഢത കാട്ടിടുന്ന രവിയാം
തേരാളി നേരിട്ടിതാ. 31

തണലാം മറുബാണമെയ്തുകൊണ്ടി-
ത്തൃണവൃക്ഷാദികളും മനുഷ്യരും കേൾ
തരുണാര്‍ക്കനൊടൊത്തെതിര്‍ക്കിലും ചെ-
റ്റണയുന്നുണ്ടു സുഖം സ്വശക്തിപോലെ. 32

ബദ്ധാദരത്താൽ ദ്വിജലോകമെല്ലാം
മാദ്ധ്യാഹ്നികം ചെയ്തു ജപിച്ചിടുന്നു;
ഉദ്യാനവാപീദ്വിജസംഘമാത്മ-
വിദ്യാജവം പോലെയടങ്ങിടുന്നു. 33

ഒന്നാമങ്കം കഴിഞ്ഞു.

---------------------------