"കാളം', 'ചൂണ്ടലിവയാൽ തെങ്ങോളംപോന്ന മത്സ്യങ്ങളെ-
ക്കാളും മോദാൽപ്പിടിക്കുന്ന കാഴ്ച കാണുവാൻ
ആളൊട്ടല്ലാക്കരയ്ക്കു പട്ടാളം പോലെ നില്പതെല്ലാ-
നാളും പതിവാണതിനു നീക്കവുമില്ല.

പേടിച്ച മത്സ്യത്തെ വള്ളമോടിച്ചുകൊണ്ടിവർ പാട്ടു-
പാടിച്ചെന്നു വലവീശിപ്പാടേ കൊന്നീടും;
കേടറ്റവകളെക്കൊണ്ടു പാടേ കറിവെച്ചെല്ലാരും
കൂടിച്ചേര്‍ന്നു തിന്നും നിത്യം കൂടുന്നമോദാൽ

മുക്കുവന്മാർ വലവീശീട്ടക്കടലിലുള്ള മത്സ്യം
മിക്കതും പിടിച്ചാരതിൽ മീനതും പെട്ടു;
വെക്കമൊക്കെക്കരയെത്തിച്ചക്കൂറ്റന്മാർ നോക്കുന്നര-
മക്കൂട്ടത്തിൽത്തിളങ്ങിക്കൊണ്ടതിനെക്കണ്ടു.

പണ്ടു കാണാത്തോരു കാന്തിയുണ്ടീമീനിനെന്നുവെച്ച
കൊണ്ടുപോയി മൂപ്പൻപക്കൽ കൊടുത്താരവർ;
കണ്ടു ദാശര്‍ക്കധീശന്നുമുണ്ടായില്ലതിന്റെ തത്വം
രണ്ടായാലുമിതു മത്സ്യരത്നമെന്നോര്‍ത്തു

"നമ്മെയെല്ലാം രക്ഷിക്കുന്ന ശംബരത്തമ്പുരാനായി-
ട്ടിമ്മഹാമത്സ്യത്തെ നാമൊത്തിന്നു കൊണ്ടുപോയ്
ചെമ്മേ കൊടുക്കേണമിതിൻ നന്മ കണ്ടാലരചര്‍ക്കാ-
ണിമ്മട്ടുള്ള ദിവ്യരത്നമിരുന്നീടേണ്ടു'.

പെട്ടെന്നേവമുറച്ചവർ പുഷ്ടഭക്തിയോടെടുത്തു
കൊട്ടും കുഴൽവിളിയുമായ്ക്കൊണ്ടുചെന്നുടൻ,
എട്ടു ദിക്കിങ്കലും വിളിപ്പെട്ട ശംബരന്റെ മുമ്പിൽ
വട്ടമിട്ടു വെച്ചു കരം വലിച്ചുകൂപ്പി.

അമ്മീനിനെ സ്വീകരിച്ചിട്ടമ്മാനി ശംബരനവർ-
ക്കുണ്മാനരി,യെണ്ണയെല്ലാമുടനേ നല്കി;
ചെമ്മേ മുക്കുവക്കൂട്ടത്തിലമ്മൂപ്പനെ വിളിച്ചേറും
സമ്മോദേന കുറേ ദ്രവ്യം സമ്മാനമേകീ.

'പോവാ'മെന്നു കല്പിച്ചപ്പോളാവന്ന മുക്കുവരെല്ലാം
കൈവണങ്ങിപ്പോന്നു മോദം കൈവളർന്നവർ.
"ഈ വന്ന മത്സ്യത്തെക്കീറി വേവിച്ചൊരു കറികൂടി-
യാവട്ടെയിന്നെന്നു ചൊന്നാനാശു ശംബരൻ.

ഭൃത്യന്മാർ മത്സ്യത്തെപാകകൃത്യം നോക്കും മയ്ക്കണ്ണിയും
സത്വരം കൊടുത്താളവൾ സാദരം വാങ്ങി,
കത്തികൊണ്ടു കീറുമ്പോളകത്തു കളതരകാന്തി
കത്തുമൊരു പൈതലിനെക്കാണായിവന്നു.

ആരും കാണാതതിനെത്താൻ നേരേ പുറത്തേയ്ക്കെടുത്തു
ചാരുവെള്ളം വീഴ്ത്തിത്തേച്ചു ചളികളഞ്ഞൂ.
പാരം നീണ്ടിടമ്പെട്ടിരിപ്പോരു നേത്രം മിഴിച്ചൊന്നു
പാരാതേ പുഞ്ചിരിയിട്ടു പൈതലന്നരം.