പെട്ടെന്നന്നേരമോടിപ്പെരിയ ജവമൊടും
ജാംബവാൻ വന്നുചാടി-
ചട്ടറ്റാക്കോപമോടീ ഹരിയൊടു പടയാ-
ടിപ്പരം വാശി കൂടി
ഒട്ടും വാർദ്ധക്യമായീടിലുമുരുബലനാ-
മായവൻമേനി വാടീ-
ലൊട്ടല്ലേഴോടു കൂടീടുമൊരിരുപതുനാ-
ളീവിധം നിന്നുകൂടി. 95

ഒടുക്കമാ നമ്മുടെ കണ്ണനുള്ളോ-
രിടിക്കു കൂടുന്നൊരു ശക്തിമൂലം
മിടുക്കനാം മര്‍ക്കടവൃദ്ധനുള്ളോ-
രുടൽക്കു വാട്ടം ചെറുതുത്ഭവിച്ചു. 96

ഇടികൊണ്ടു മശങ്ങിയോരുനേരം
തടികൊണ്ടാക്കപി കൺമിഴിച്ചുനോക്കി
ഉടൽ കണ്ടുരചെയ്തു കണ്ണനോടായ്
മുടികൊണ്ടാക്കഴൽ മുട്ടുമാറു കൂപ്പി. 97

"അല്ലാ നമ്മുടെ സേതുബന്ധകരനായ്,
രക്ഷോബലാരാതിയായ്,
ചൊല്ലാളും രഘുനാഥനായ ഭഗവാൻ
മൽഭാഗ്യമല്ലോ ഭവാൻ?
അല്ലാതിങ്ങിനെ ഞാനൊരാളൊടു മട-
ങ്ങീടില്ല, പിന്നാക്കമാ-
കില്ലാ നമ്മുടെ രാമഭദ്രനലിവോ-
ടെന്നിൽ പ്രസാദിക്കയാൽ. 98

കഷ്ടം ഞാൻ മമ നാഥനായ രഘുനാ-
ഥന്‍തന്നിലിന്നീവിധം
പൊട്ടുമ്മാറടി കൂട്ടിനേ; നിതിനു മേ-
ലെന്തൊന്നഹോ സാ ഹസം!
ആട്ടേ, നിന്തിരുമേനിതന്റെ വരവാ-
ണല്ലോ നമുക്കീവിധം
കാട്ടാൻ കാരണമായതെന്നു തിരുവു-
ള്ളക്കേടു കൊള്ളില്ല മേ 99

എങ്കിലുമെൻപിഴ തീരാൻ
പെൺകുലമണി പുത്രി ജാംബവതിയേ ഞാൻ
നിങ്കലണക്കുന്നേൻ രവി-
തന്‍കലയാകും സ്യമന്തകത്തോടും. 100

മഹാജനത്തിന്നതിദോഷമാകും,
മഹാപവാദങ്ങൾ കൃതിച്ചതിന്നായ്
മഹാസഭക്കുള്ളിൽ നമുക്കു കാണാ-
മിഹായവൻ വിഡ്ഢിയതാവതെല്ലാം. 101

വിഷ്കംഭം കഴിഞ്ഞു.

അങ്ങുന്നിങ്ങിനെയെന്നിലല്പമയശ-
സ്സുണ്ടാക്കിയെന്നീവിധം
മങ്ങുന്നില്ല മുഷിച്ചിലില്ലതിനെനി -
യ്ക്കേതും ധരിച്ചീടണം;
തിങ്ങും സങ്കടമായതിൽ പലതുമോ-
തിടും ജനം, കേട്ടു കേ-
ട്ടിങ്ങേവം നിരുപിച്ചതെൻ ശനിപിഴ-
ക്കാലത്തു കോലും ഫലം. 102

എന്നാലീ മണി കിട്ടിയോരു വിവരം
സര്‍വ്വം ചുരുക്കിക്കഥി-
ക്കുന്നേൻ; നിങ്ങടെ തമ്പിയെബ്ബലമെഴും
സിംഹേന്ദ്രനാം കൊന്നതും;
പിന്നീടായവനെക്കടുത്തു പൊരുതി-
ശ്രീജാംബവാൻ കൊന്നു; ഞാൻ
ചെന്നിട്ടായവനൊടെതിര്‍ത്തു പൊരുതി-
ക്കൈക്കൊണ്ടു രത്നത്തെയും. 103

നിന്തിരുവടിയരുളുന്നതി-
നന്തരമില്ലധികമൂഢനാകും ഞാൻ
എന്തൊരു പിഴ ചെയ്തീടിലു-
മന്തരമോര്‍ത്തതു പൊറുത്തുകൊള്ളണമേ. 104

അന്നിജ്ജനം പിഴകൾ ചെയ്തതു, സത്യഭാമ-
യെന്നുള്ളൊരെന്റെ മകളെത്തവ തന്നിദാനീം
മന്ദത്വമറ്റകൃപകൊണ്ടു പൊറുക്കുവാനാ-
യിന്നോര്‍ത്തുകൊണ്ടു മകളെത്തവ തന്നിടുന്നേൻ. 105

കൊണ്ടൽക്കാർകൂപ്പുമോമൽതിരുവുടൽനിറവും,
നീണ്ടിടംപെട്ട കണ്ണും,
കണ്ടാൽ കിട്ടാത്ത മാദ്ധ്യസ്ഥ്യവു, മധികമതായ്
നീണ്ട തൃക്കയ്യുരണ്ടും,
പൂണ്ടീടും പുഞ്ചിരിപ്പുമൃദുലതരനിലാ-
വേന്തുമാസ്യേന്ദുവും താൻ
കണ്ടീടും കഞ്ജനേർക്കണ്ണികളുടെ മനതാർ
മട്ടു മാറാതെയാമോ? 106

അന്നു രുഗ്മിണിയെ വേട്ടനാളിൽവെ-
ച്ചൊന്നുകൂടിയധികം മനോഭവൻ
ഇന്നു നമ്മൊടു കർത്തിടുന്നിതാ!
നന്നു നന്നു നളിനാക്ഷിയേറ്റവും. 107

നമ്മുടെ തോഴിക്കേറ്റം
നന്ദിയൊടൊക്കുന്നൊരാളു ഗോവിന്ദൻ;
ഇമ്മറിമായകളിവളുടെ
കര്‍മ്മമതെന്നേ നിനയണ്ടൂ. 108

നമുക്കു പെട്ടീടിന കുറ്റമെല്ലാം
ക്ഷമിച്ചുകൊണ്ടീടുക കൊണ്ടൽവര്‍ണ്ണ!
സമസ്തപാപത്തിനുമെന്റെ സര്‍വ്വ-
സമസ്തമാം നന്ദിനിയെത്തരുന്നേൻ. 109

ഘോരാപരാധമതിനും
കാരണമാമിസ്യമന്തകത്തേയും
പാരാതെ തന്നിടുന്നേൻ
നേരെ കൈക്കൊണ്ടു കൊണ്ടീടുകവേണം. 110

ആദിത്യഭക്തികലരുന്ന ഭവാനു നിത്യ-
മാദിത്യപൂജയതിനായിതിരുന്നിടട്ടേ;
വാദത്തെവിട്ടു വടിവോടിഹ നാമിതിന്റെ
മോദത്തോടൊത്ത ഫലമൊന്നു ലഭിച്ചുകൊള്ളാം. 111

എന്മണിയതൃപ്തിവേണ്ടാ;
പെൺമണിയാം സത്യഭാമയേ വാങ്ങി
നമ്മുടെ പരിഭവമെല്ലാം
നന്മയോടിഹ തീര്‍ന്നു: തൃപ്തികൊണ്ടാലും. 112

"പാരാതിപ്പുരമൊക്കെയും പദവിയിൽ-
പാരം വിതാനിയ്ക്കയാൽ -
ച്ചേരും നൽപുതുഭംഗിയോടു വിലസീ-
ടുന്നുണ്ടതെന്നല്ലഹോ!
സ്വൈരം സർവ്വവധൂജനങ്ങളുമുടൻ
കല്യാണഘോഷത്തിനായ്
ഭാരം പൂണ്ടതുപോലെ വന്നു വിലസീ-
ടുന്നുണ്ടിതെല്ലാടവും. 113

ചെമ്മേ ജാംബവതിക്കു വേണ്ടഴകൊടും
മോടിപ്പെടുത്തിത്തെളി-
ഞ്ഞുന്മേഷത്തൊടു വന്നിടുന്നു വസുദേ-
വൻ ദേവകീദേവിയും;
നമ്മേളത്തൊടു കൊട്ടു പാട്ടു പലതു-
ണ്ടാഘോഷമിപ്പോൾ മുദാ
സന്മൌഹൂര്‍ത്തികർ ചൊന്നപോലെ വെളിവാ-
യ്‍വേളിക്കെഴും നേരവും. 114

തെളിവുകൂടിന കണ്ണനെ നോക്കിടു-
ന്നളവു കണ്ണിനു നാണമെഴുന്നു മേ;
വളവുകൂടിന കണ്ണുകൾ പിന്നെയും
കളവൊടായവനിൽ പതിയുന്നിതാ. 115

നന്മയതിയായ് വിളങ്ങും
ജാംബവതീതന്വിതന്നിലെത്തുമ്പോൾ
കണ്മതികൾക്കു വികാസം
വെണ്മ തിരണ്ടിട്ടുരുണ്ടുകൂടുന്നു. 116

വേളിയ്ക്കെഴും ക്രിയതുടര്‍-
ന്നാളിടുമനലപ്രകാശമോടിവിടെ
മേളമൊടൊരുക്കമായി-
ട്ടാളുകൾ കാത്തുണ്ടു നില്ക്കുന്നു. 117

നിങ്ങൾ പറയുന്നതിന്നിഹ
ഞങ്ങൾക്കുണ്ടോ മറിച്ചൊരാൾപക്ഷം?
മംഗളകര്‍മ്മമിതെന്നാ-
ലങ്ങിനെയാട്ടേ നടക്കട്ടേ. 118

കണ്ണനു ചേരുന്നവരീ-
പ്പെണ്ണുങ്ങൾ ഗുണങ്ങളൊക്കെയോര്‍ക്കുമ്പോൾ
കണ്ണിനുമധികമെനിക്കീ-
വണ്ണം വന്നതു രസം, മനസ്സിന്നും. 119

എനിക്കുമീനിങ്ങളൊടിത്ര ചാര്‍ച്ച-
ജനിക്കയാൽ പ്രീതി വളര്‍ന്നിടുന്നു;
അനർഘകീര്‍ത്തേ! വസുദേവ! ഹേ! ഞാ-
നിനിര്‍ഗ്ഗമിക്കട്ടെ; മുകന്ദ! പോട്ടേ! 120

മംഗളതൂര്യനിനാദം
ഭംഗിയിലിപ്പോൾ പുറത്തു കേൾക്കുന്നു;
ഇങ്ങിനെ മേലാലനവധി
മംഗളമുണ്ടായ്‍വരും മുകുന്ദന്നും. 121

കൃപാകടാക്ഷാൽ തവ താത! ഞാനീ-
വിപത്തിലും മംഗളമാര്‍ന്നു പോന്നു;
സ്വഭാവകാരുണ്യമിവണ്ണമെന്നും
ശുഭത്തൊടമ്മേ! കലരേണമെന്മേൽ. 122

നാലാമങ്കം കഴിഞ്ഞു.

---------------------------